Mes gjithë vëmendjes që ka marrë emri i tij gjatë ditëve të fundit, Adrian Hila feston sot, më 7 tetor, ditëlindjen. Kompozitori dhe producenti shqiptar mbush 56 vjeç.
Hila ka lindur më 7 tetor 1970 në Vlorë dhe prej dekadash është pjesë e skenës muzikore shqiptare, me një karrierë të lidhur me festivale dhe bashkëpunime me një numër të madh artistësh.
Ditëlindja e këtij viti e gjen kompozitorin në një situatë krejt të pazakontë. Prej ditësh emri i tij është në qendër të vëmendjes pas publikimit dhe shpërndarjes në internet të disa videove private të regjistruara në ambiente të lidhura me të.
Çështja ka marrë përmasa të mëdha publike, ndërsa disa prej personave të përfshirë kanë reaguar duke deklaruar se nuk kishin dijeni se po filmoheshin. Edhe vetë Hila është marrë në pyetje nga autoritetet.
Sipas raportimeve mbi dëshminë e tij, kompozitori ka ngritur pretendimin se sistemi i kamerave ishte vendosur për arsye sigurie dhe se materialet mund të jenë siguruar pas ndërhyrjes së paautorizuar në sistem.
Megjithatë, mënyra konkrete se si pamjet janë siguruar dhe më pas kanë përfunduar në rrjet mbetet objekt verifikimesh. Deri në përfundimin e hetimeve, pretendimi për hakerimin nuk mund të konsiderohet një rrethanë e provuar.
Kështu, 56-vjetori i Adrian Hilës vjen në një prej periudhave me vëmendjen më të madhe publike ndaj tij, këtë herë jo për muzikën dhe karrierën e tij shumëvjeçare, por për çështjen që ka dominuar mediat dhe rrjetet sociale gjatë ditëve të fundit.
