Martohej me burra të moshuar dhe më pas i helmonte

1

Një nga rastet më të rënda të vrasjeve seriale në Iran ka përfunduar me dënim me vdekje për Kolshoum Akbari, e njohur në mediat iraniane si “Vejusha e Zezë”.

Ajo është shpallur fajtore për vrasjen e 11 burrave të moshuar dhe për një tentativë vrasjeje, ndërsa aktiviteti i saj kriminal dyshohet se ka zgjatur për më shumë se dy dekada, nga fillimi i viteve 2000 deri në arrestimin e saj në vitin 2023.

Sipas hetimeve, viktimat ishin kryesisht burra të moshuar, shumë prej tyre të ve ose që jetonin vetëm. Akbari dyshohet se fitonte besimin e tyre, martohej me ta dhe më pas i helmonte.

Autoritetet thonë se ajo përdorte një kombinim qetësuesish, ilaçesh për diabetin, alkooli industrial dhe substancash të tjera, të cilat ua jepte viktimave drejtpërdrejt ose ua përziente në ushqim dhe pije.

Për shkak të moshës dhe problemeve shëndetësore të viktimave, shumë prej vdekjeve fillimisht ishin konsideruar si natyrore.

Rasti u zbulua në vitin 2023, pas vdekjes së bashkëshortit të saj të fundit, një 82-vjeçar. Para vdekjes, ai u kishte treguar fëmijëve se Akbari e detyronte të merrte ilaçe, pas të cilave humbiste vazhdimisht ndjenjat.

Pas denoncimit të familjes, hetuesit zbuluan se Akbari ishte martuar me disa burra të tjerë, shumë prej të cilëve kishin vdekur pak kohë pas martesës.

Hetimi u zgjerua edhe në raste të vjetra, duke përfshirë zhvarrime dhe analiza të reja toksikologjike.

Sipas autoriteteve, motivi dyshohet se ishte financiar. Akbari dyshohet se i bindte disa prej burrave të transferonin prona dhe automjete, ndërsa përfitonte edhe nga pensionet dhe kursimet e tyre.

Gjykata e shpalli fajtore për 11 vrasje të qëllimshme dhe një tentativë vrasjeje. Dhjetë familje të viktimave kërkuan ekzekutimin e saj, ndërsa një familje zgjodhi kompensimin financiar.

Si rezultat, ndaj Akbarit janë shqiptuar dhjetë dënime me vdekje, si dhe dhjetë vjet burg për tentativën e vrasjes. Gjykata urdhëroi gjithashtu konfiskimin e pasurisë së saj.

Vendimi mund të apelohet para se të marrë formë të prerë.