30 vjet karrierë, grupi Aqua tërhiqet nga skena

1

Grupi danez Aqua, i njohur në mbarë botën për hitin “Barbie Girl”, ka njoftuar se do të ndalojë performancat live pas gati tre dekadash në skenë.

Në një deklaratë të publikuar në rrjetin social Instagram, anëtarët e grupit shprehën mirënjohje për rrugëtimin e tyre muzikor dhe për mbështetjen e fansave ndër vite. “Pas shumë vitesh të jashtëzakonshme, kemi vendosur të mbyllim kapitullin e AQUA si një grup që performon live”, thuhej në deklaratë.

Ata theksuan se kanë udhëtuar në mbarë botën, kanë takuar miliona fansa dhe kanë krijuar kujtime të paharrueshme, duke e cilësuar këtë periudhë si një nga më të rëndësishmet e jetës së tyre artistike.

Barbie Girl e publikuar në vitin 1997 mbetet hiti më i madh i grupit dhe një nga këngët më ikonike të kulturës pop ndërkombëtare, pjesë e albumit “Aquarium”.

Kënga ka qenë edhe në qendër të debateve ligjore ndër vite, pasi në fillim të viteve 2000 kompania Mattel ngriti padi për përdorimin e markës “Barbie”, por çështja u rrëzua në gjykatë si parodi e mbrojtur ligjërisht.

Në vitin 2023, “Barbie Girl” u rikthye në vëmendje globale pas përdorimit të saj në kolonën zanore të filmit Barbie, duke sjellë një tjetër valë suksesi për grupin dhe duke e rikthyer atë në top-listat ndërkombëtare.