Një incident i papritur është shënuar gjatë protestës së opozitës, ku lideri i Partisë Demokratike, Sali Berisha, është detyruar të largohet para kohe për shkak të një problemi shëndetësor.
Sipas raportimeve, ai është ndjerë keq pasi në drejtim të tij është hedhur spray, i cili i ka shkaktuar irritim në sy dhe vështirësi në frymëmarrje.
Fillimisht, situata ka krijuar shqetësim në mesin e të pranishmëve, ndërsa Berisha është rrethuar menjëherë nga truprojat e tij për t’u mbrojtur dhe për të marrë ndihmën e nevojshme. Dëshmitarët në vendngjarje bëjnë me dije se ai shfaqte shenja shqetësimi, veçanërisht në zonën e syve, duke e bërë të pamundur vazhdimin e qëndrimit në protestë.
Më pas, lideri i opozitës është larguar nga tubimi dhe është drejtuar drejt banesës së tij, ku ka qëndruar për t’u rikuperuar. Sipas raportimit të gazetares së Top Channel, Elda Menga, Berisha ndodhet poshtë banesës së tij, i shoqëruar nga disa mbështetës besnikë.
Ngjarja ka sjellë reagime të shumta dhe ka shtuar tensionin në protestë, ndërsa pritet që autoritetet të sqarojnë plotësisht rrethanat e këtij incidenti dhe përdorimin e spray-t gjatë tubimit.
