Laert Vasili ka reaguar për çështjen e videove intime që kanë qarkulluar ditët e fundit në rrjet, duke iu drejtuar në një moment drejtpërdrejt kompozitorit Adrian Hila.
I ftuar në “Grida Duma Podcast”, aktori foli për publikimin e materialeve private dhe pasojat që një situatë e tillë mund të ketë për personat e përfshirë dhe familjet e tyre.
Gjatë diskutimit, Vasili ngriti një pyetje të drejtpërdrejtë ndaj Hilës, duke e vendosur atë përballë një situate hipotetike që përfshinte njerëzit e tij më të afërt.
“Po t’ia bënin vajzës dhe gruas tënde atë?”, u shpreh aktori.
Me këtë deklaratë, Vasili e zhvendosi diskutimin nga buja që kanë shkaktuar videot te cenimi i privatësisë dhe pasojat personale që sjell regjistrimi apo publikimi i materialeve intime.
Rasti ka marrë tashmë edhe rrugë institucionale. Adrian Hila është marrë në pyetje nga autoritetet në lidhje me materialet që përfunduan në internet, ndërsa hetimet synojnë të sqarojnë mënyrën se si janë siguruar dhe shpërndarë pamjet.
Sipas raportimeve të A2 CNN, Hila është proceduar penalisht në gjendje të lirë dhe materialet i janë referuar Prokurorisë për veprën penale “Ndërhyrja e padrejtë në jetën private”.
Vetë Hila, në deklarimet e raportuara më herët, ka pretenduar se sistemi i kamerave ishte vendosur për arsye sigurie dhe se materialet mund të jenë siguruar pas ndërhyrjes në sistem. Rrethanat konkrete dhe përgjegjësitë mbeten objekt i hetimit nga autoritetet.
