“Kanë fëmijë jashtë martese”/ Trondit Eni Çobani përballë Grida Dumës për çiftin e njohur shqiptar

Eni Çobani ka rrëfyer një prej rasteve më të vështira që i është dashur të ndërmjetësojë gjatë karrierës së saj. E ftuar në “Grida Duma Podcast”, juristja foli për një çift shqiptar shumë të njohur për publikun, identitetin e të cilëve zgjodhi ta mbante të fshehtë.

Sipas Çobanit, bëhet fjalë për një familje shumë të pasur, e cila në publik përcillte imazhin e një çifti të lumtur dhe të afërt. Realiteti brenda shtëpisë, megjithatë, ishte krejt tjetër.

“Unë ata i kisha takuar herë pas here si ajo familja që vetëm putheshin dhe përqafoheshin dhe ndërkohë ata kishin një dramë brenda familjes”, tregoi ajo, duke shtuar se të dy bashkëshortët i kishin rrëfyer me qetësi historitë dhe problemet që kishin përjetuar ndër vite.

Sipas juristes, marrëdhënia ishte dëmtuar nga mungesa e komunikimit dhe raportet jashtëmartesore. Ajo pretendoi se bashkëshorti kishte pasur disa marrëdhënie të tjera dhe se, me kalimin e kohës, edhe gruaja kishte vepruar në të njëjtën mënyrë. Situata kishte arritur deri në ardhjen në jetë të një fëmije, atësia e të cilit, sipas rrëfimit të Çobanit, nuk i përkiste bashkëshortit.

“Ardhja e një fëmije e kishte traumatizuar”, tha ajo, duke shpjeguar se pikërisht kjo situatë kishte qenë ndër pjesët më të ndërlikuara të procesit të ndërmjetësimit.

Megjithatë, çifti nuk është divorcuar. Sipas Çobanit, ata nuk jetojnë më fizikisht së bashku dhe secili vazhdon jetën e tij sentimentale, por ligjërisht martesa vazhdon. Në vendimin për të mos u divorcuar, sipas saj, një rol të rëndësishëm ka luajtur edhe pasuria e konsiderueshme e familjes dhe mënyra se si do të ndahej ajo.

Juristja nuk dha asnjë të dhënë që mund të konfirmojë identitetin e personave të përfshirë, duke theksuar se historia nuk është bërë asnjëherë publike. Për këtë arsye, çdo emër që mund të lidhet në rrjet me rrëfimin e saj do të mbetej vetëm spekulim.