Mot ekstrem në fillim të vjeshtës: Paralajmërimet e ekspertëve për Europën pas valës së të nxehtit – Lajme Big Brother Vip

Specialistët e meteorologjisë kanë lëshuar një paralajmërim se pas stinës së nxehtë, Europa do të përballet me reshje intensive që mund të shkaktojnë përmbytje në zona të ndryshme.

Sipas informacioneve të siguruara nga sistemi ndërkombëtar i parashikimit WFY24, ditët e para të shtatorit do të mbeten mjaft të ngrohta për vendet mesdhetare, ku termometri në Romë pritet të shënojë 35°C, në Athinë 34°C dhe në Madrid 33°C. Këto vlera janë 6 deri në 8 gradë Celsius më të larta se standardet e kësaj periudhe, një tregues ky se fenomenet e verës po bëhen më jetëgjata dhe po shtrihen përtej kohës së zakonshme.

Nga ana tjetër, Europa Veriore po përballet me kushte shumë më “të freskëta dhe të paqëndrueshme”, ku temperaturat në qytete si Londra dhe Berlini nuk kalojnë 20-21°C.

Stuhitë dhe shirat e rrëmbyeshëm kanë zëvendësuar tashmë valën e të nxehtit, duke hidratuar tokat që kishin mbetur të thara në një pjesë të Francës, Gjermanisë dhe Mbretërisë së Bashkuar.

Për sa i përket rajonit të Mesdheut, pritet të shënohet rritja më e ndjeshme e vëllimit të reshjeve.

“Shtatori dhe tetori janë sezoni i përmbytjeve të menjëhershme në Mesdhe: deti është në temperaturën më të lartë vjetore pas tre muajsh ngrohjeje, ndërsa rrymat e para të ftohta mbërrijnë në lartësi,” thotë Ioanna Vergini, themeluese e WFY24. Në qendër të vëmendjes mbetet gjithashtu fenomeni El Niño, për të cilin ekspertët vlerësojnë se mund të rezultojë “më i fuqishmi i regjistruar ndonjëherë” këtë vit.

Organizata Botërore Meteorologjike ka bërë të ditur se ky fenomen klimatik po vijon të “intensifikohet në mënyrë të qëndrueshme” dhe është parashikuar që të “dominojë modelet klimatike” gjatë dy muajve të ardhshëm.

Edhe pse El Niño ndikon në rritjen e temperaturave globale duke krijuar premisat për mot më ekstrem, ndikimet e tij kryesore vërehen në zonat tropikale.

Në të kaluarën, gjatë episodeve të ngjashme, Amerika e Jugut, Afrika Lindore, Azia Qendrore dhe jugu i SHBA-ve kanë qenë më të rrezikuara nga përmbytjet, ndërkohë që në pjesë të Australisë, Indonezisë dhe zonat veriore të Amerikës së Jugut është shtuar risku për zjarre dhe thatësira.

Pavarësisht zërave që e lidhin vapën e verës në Europë me fenomenin El Niño, specialistët kanë nënvizuar se përgjegjësi kryesor për këto ndryshime mbeten ndryshimet klimatike.