I mbijetoi kancerit, 40-vjeçari vdes pasi provoi ilaçin nga lëkura e bretkosës

3

Një trajner mirëqenieje ka vdekur pasi dyshohet se ka provuar një ilaç të bërë nga lëkura e një bretkose helmuese.
I mbijetuari i kancerit, Kristian Trend, thuhet se është rrëzuar në apartamentin e tij pasi ka pirë ilaçin, të njohur si “Kambo”, në një ceremoni pastrimi muajin e kaluar, shkruan Metro, transmeton Klankosova.tv.

40-vjeçari besohet se e ka marrë ilaçin, të bërë nga mukusi i nxjerrë nga lëkura e bretkosës gjigante me gjethe, si pjesë e një “ceremonie”.

Toksina e rrezikshme është tashmë e ndaluar në Australi, Brazil dhe Kili, por është ende e disponueshme për blerje ligjërisht në Mbretërinë e Bashkuar. Nëna e Kristianit, Angie, tha se djali i saj ishte shumë shpirtmirë dhe thuhet se i kishte thënë se donte të “pastrohej”.

“Ai mori shumë vitamina, por nuk e di se çka ndodhi”, tha ajo për Telegraph. “Nuk i kemi marrë ende rezultatet e testeve, nuk di asgjë dhe as nuk mendoj se dua të di çka ndodhi. Nuk mund ta kthej mbrapsht”.
Kristiani ishte shëruar më parë nga kanceri i limfomës Burkitt, pasi kishte kaluar katër muaj në spital.

Ai më parë tha për betejën e tij me kancerin: “Në moshën 23 vjeç, më dhanë deri në gjashtë muaj për të jetuar pa trajtim intensiv. Një diagnozë e rrallë e kancerit më detyroi të zgjidhja: të jetoja me frikë ose t’i dorëzohesha një qëllimi më të lartë”.