Monika Kryemadhi zbulon nese do te jete perseri opinioniste ne Big Brother Vip Albania 6 – Lajme Big Brother Vip – Lajmi i Fundit, Lajmet e Fundit
Monika Kryemadhi ka folur për mundësinë e rikthimit në “Big Brother VIP Albania”, këtë herë si pjesë e sezonit të ri të formatit.
E ftuar në emisionin “Goca dhe Gra”, ajo është përballur me një pyetje të drejtpërdrejtë nga Selin Bollati, e cila ka dashur të dijë nëse do ta shohim sërish në reality show.
“Këtë sezon të ri, në Big Brother do jesh apo jo?”, e pyeti Selin, duke e vendosur Kryemadhin përballë një përgjigjeje që mund të zbulojë planet e saj televizive.
Ish-deputetja nuk e përjashtoi mundësinë e pjesëmarrjes, madje pranoi se do ta dëshironte një eksperiencë të tillë. Megjithatë, ajo theksoi se vendimi përfundimtar i takon produksionit.
“A do kisha qejf? Patjetër që do kisha qejf, por mendoj që janë ngritur njerëzit për sistem të ri, njerëz të rinj. Çfarë do bëj unë prapë në BBV? Mendoj që kjo është në dorë të produksionit dhe mendoj që Sara është ajo që i merr vendimet, bashkë me grupin e punës që e vendosin. Unë di të them që kam kaluar një kohë të jashtëzakonshme në BBV me gjithë stafin”, u shpreh Kryemadhi.
Por biseda nuk u ndal vetëm te sezoni i ardhshëm. Selin Bollati shfrytëzoi rastin për t’i kujtuar Kryemadhit komentet që ajo kishte bërë për të gjatë kohës kur ishte opinioniste e “Big Brother VIP”, ndërsa Selin konkurronte si banore.
“Me ty shikoja veten time shumë të re. Sigurisht që ma hiqje truri me Mirin”, tha Kryemadhi, duke shkaktuar batuta në studio.
“Monika, më ke rënë në qafë, por nuk do bëj sherr sot me ty, kështu që po e lë me kaq”, iu përgjigj Selin.
Pavarësisht ngacmimeve, Kryemadhi nuk i kurseu vlerësimet për ish-banoren, duke veçuar mënyrën e saj të të shprehurit dhe karakterin luftarak.
“Të adhuroja për artikulimin, pozicionin luftarak që kishe, se për hir të së vërtetës një grua dhe një vajzë në Shqipëri e ka të domosdoshme të luftojë dhe gjithmonë humbet ajo që nuk lufton”, deklaroi ajo.
Kryemadhi shtoi se gratë duhet të jenë të vendosura përballë vështirësive dhe t’ua përcjellin këtë forcë edhe vajzave të tyre.
Sa i përket “Big Brother VIP”, mbetet për t’u parë nëse dëshira e shprehur nga Kryemadhi do të konkretizohet në sezonin e ardhshëm, pasi deri tani ajo nuk ka konfirmuar ndonjë marrëveshje me produksionin.
