Reagon për herë të parë Adrian Hila, ja çfarë deklaroi!

Kompozitori Adrian Hila ka reaguar për herë të parë pas shpërndarjes në rrjetet sociale të videove me përmbajtje intime, të cilat gjatë orëve të fundit kanë shkaktuar një debat të gjerë dhe kanë përfshirë emra të njohur të showbizit shqiptar.

Ndërkohë, Policia e Tiranës kërkon ta marrë në pyetje Hilën në lidhje me materialet e publikuara. Sipas raportimit të Top News, Drejtoria Vendore e Policisë Tiranë ka nxjerrë këtë të enjte një ftesë për paraqitjen e kompozitorit.

Efektivët kanë shkuar edhe në banesën e tij për ta kontaktuar, por Hila nuk është gjetur aty. Më pas, sipas të njëjtit burim, është arritur të kontaktohet përmes telefonit.

Në këtë komunikim ka ardhur edhe reagimi i parë i kompozitorit për atë që ka ndodhur. Hila është shprehur se është “shumë i shokuar dhe i tronditur”, ndërsa ka pretenduar se është hakeruar.

Ai ka bërë të ditur gjithashtu se aktualisht nuk ndodhet në Tiranë dhe se do të paraqitet në polici sapo të mbërrijë në kryeqytet.

Interesimi i Policisë lidhet me videot intime që u shpërndanë një ditë më parë në rrjetet sociale. Paralelisht, strukturat e Krimit Kibernetik kanë nisur verifikimet për të përcaktuar burimin e materialeve dhe mënyrën se si ato kanë përfunduar në internet.

Deklarata e Hilës se është hakeruar përbën versionin e tij për ngjarjen. Në këtë fazë nuk është bërë publik një përfundim i hetimeve që të përcaktojë se nga janë marrë videot, kush i ka shpërndarë fillimisht apo në çfarë mënyre janë siguruar.

Po ashtu, fakti që Policia kërkon ta marrë në pyetje nuk nënkupton se Hila është shpallur në kërkim policor apo se ndaj tij është ngritur akuzë. Sipas informacionit të raportuar deri tani, bëhet fjalë për një ftesë për paraqitje dhe marrje në pyetje në kuadër të verifikimeve për materialet e shpërndara.