VIDEO/ Po varroste kushëririn, hajduti i futet në makinë këngëtarit të muzikës popullore dhe i merr paratë

Këngëtari i muzikës popullore Bledar Hoxhaj ka denoncuar një vjedhje të ndodhur në Fier, teksa ai dhe familjarët e tij ndodheshin në ceremoninë mortore të kushëririt të parë.

Sipas Hoxhajt, ngjarja ka ndodhur rreth orës 10:00. Një person është futur në automjetin e tij, një “Audi Q5” me ngjyrë gri të errët, dhe ka marrë paratë që ndodheshin në portofolin e lënë brenda. Portofoli, sipas këngëtarit, është lënë në makinë.

Momenti është regjistruar nga kamerat e sigurisë. Në pamje, sipas denoncimit të Hoxhajt, shihet personi teksa futet në automjet dhe më pas largohet nga zona me një “Opel” me ngjyrë gri të hapur.

Këngëtari ka publikuar rastin në rrjetet sociale dhe u ka kërkuar ndihmë qytetarëve që mund të njohin personin, automjetin ose të kenë informacione që mund të ndihmojnë në identifikimin e tij. Ai ka bërë të ditur gjithashtu se pamjet do t’u dorëzohen autoriteteve.

“Gjatë ceremonisë mortore të vëllait tim (kushëri i parë), rreth orës 10 e pak minuta, një person është futur në makinën time Audi Q5, ngjyrë gri e errët, dhe ka marrë vetëm paratë që ndodheshin brenda portofolit. Portofolin e ka lënë në makinë”, shkruan Hoxhaj.

Ai ka treguar se ngjarja ka ndodhur pikërisht në momentin kur po përcillte të afërmin e tij për në banesën e fundit.

“Në një ditë zie, kur isha duke përcjellë vëllain tim për në banesën e fundit, është shumë e dhimbshme të ndodhë edhe diçka e tillë”, përfundon këngëtari, duke kërkuar që denoncimi të shpërndahet për të ndihmuar në identifikimin e autorit.