Vala e nxehtë afrikane përfshin Shqipërinë, sa do të shkojnë temperaturat këtë fundjavë? – Lajme Big Brother Vip

Dita e diel shënon kulmin e vapës për këtë javë në vendin tonë, me termometrin që parashikohet të prekë 39°C në disa rajone. Sipas ekspertëve të meteorologjisë, ky do të jetë momenti më i nxehtë i këtyre ditëve.

Referuar parashikimeve të sinoptikanes Lajda Porja, qarku i Shkodrës do të përjetojë vlerat më ekstreme, ndërsa në Elbasan, Berat dhe Gjirokastër merkuri pritet të ngjitet deri në 38°C.

Për sa i përket ultësirës perëndimore, parashikohen vlera mes 36 dhe 37°C, ndërkohë që zonat bregdetare do të kenë temperatura pak më të moderuara, që do të lëvizin nga 33 deri në 35°C.

Kryeqyteti gjithashtu do të përfshihet nga ky mot i nxehtë. Ndonëse nuk parashikohen reshje shiu, kombinimi i lagështirës së lartë me vranësirat do të bëjë që vapa të ndihet edhe më rëndë, me temperaturën e ndjeshme në Tiranë që mund të prekë shifrën 40°C, siç thekson Porja.

Ky nuk do të jetë një fenomen i izoluar vetëm për ditën e diel, pasi i nxehti do të vazhdojë të mbizotërojë gjatë të gjithë dhjetëditëshit të fundit të gushtit.

Në ultësirën perëndimore, temperaturat do të qëndrojnë në nivele të larta, duke shënuar 36-37°C.

Shqipëria, sipas sinoptikanes, po ndikohet nga një valë e nxehtë me origjinë afrikane, e cila ka përfshirë edhe pjesë të tjera të Mesdheut.

Sa i takon reshjeve, ato do të jenë me intensitet të ulët dhe të përqendruara në zona të kufizuara. Gjatë së premtes, shtunës dhe së dielës, mund të ketë rrebeshe kalimtare në disa qytete si Librazhd, Elbasan, Pogradec, Korçë, Ersekë, Bilisht, Tepelenë dhe Përmet.

Këto reshje do të jenë mjaft të shkurtra dhe do të prekin vetëm hapësira sporadike. Në bregdet moti do të mbizotërohet nga kthjellimet, ndërsa Tirana do të ketë paradite me diell dhe pasdite më të vranëta, por pa rrezik për reshje të konsiderueshme.

Deri në përfundim të muajit, situata nuk pritet të ndryshojë, me temperatura të qëndrueshme dhe shi vetëm nëpër zona të caktuara të maleve lindore.