Humb jetën në moshën 38-vjeçare drejtori i televizionit, gjendet pranë një qendre tregtare – Lajme Big Brother Vip

Opinionin publik e ka përfshirë pikëllimi pas lajmit për ndarjen nga jeta të Lirim Hajredinit, i cili mbante postin e drejtorit në televizionin “Alsat” që zhvillon aktivitetin e tij në Maqedoninë e Veriut. Trupi i pajetë i 38-vjeçarit u gjet në afërsi të një qendre tregtare.

Ende nuk dihen shkaqet e sakta që çuan në këtë ngjarje të rëndë, me autoritetet që po hetojnë të gjitha pistat, duke përfshirë edhe mundësinë e një akti vetëvrasës, ndonëse nuk ka asgjë të konfirmuar zyrtarisht. Për të hedhur dritë mbi shkaqet e vërteta të vdekjes, trupi i viktimës është dërguar në spital për t’iu nënshtruar procedurave të autopsisë.

Ky lajm ka shkaktuar një tronditje të thellë, sidomos te stafi i televizionit Alsat, ku Hajredini ishte pjesë e ekipit për mbi 16 vite. Vetë televizioni, deri në këtë fazë, nuk ka lëshuar ende ndonjë deklaratë zyrtare mbi humbjen e drejtorit të tyre.

Nga ana tjetër, Ministria e Brendshme ka konfirmuar se 38-vjeçari ka gjetur vdekjen si pasojë e dëmtimeve trupore, ndërsa dinamika e plotë e ngjarjes mbetet për t’u sqaruar.

“Sot (13.08.2026), rreth orës 09:25, në SPB Shkup është raportuar se para një ndërtese në bulevardin „Krste Misirkov“ në Shkup ndodhet një person me lëndime. Në vendngjarje kanë dalë zyrtarë policorë nga Stacioni Policor Bit Pazar, të cilët kanë konstatuar se bëhet fjalë për L.H. (38) nga Shkupi.

Personi ka ndërruar jetë si pasojë e lëndimeve të marra, ndërsa vdekjen e ka konstatuar mjeku i Ndihmës së Shpejtë Mjekësore” njoftoi sot Ministria e Brendshme e Maqedonisë.

Gjatë karrierës së tij, Hajredini njihej si një menaxher me përvojë të gjatë në fushën mediatike, duke dhënë kontribut të çmuar në strategjitë e biznesit, marketing dhe produksionin televiziv, përveçse punës së tij si përkthyes i literaturës së specializuar.