Valë të nxehti deri në 41 gradë, meteorologu Hakil Osmani zbardh parashikimin për gjysmën e parë të gushtit – Lajme Big Brother Vip

Sipas parashikimeve të meteorologut Hakil Osmani, vendi ynë do të përballet me temperatura të larta si gjatë fundjavës ashtu edhe në ditët në vijim të javës së ardhshme.

Termometri pritet të shënojë deri në 41 gradë Celsius në pjesën më të madhe të vendit, ku do të mbizotërojë një mot i qëndrueshëm, megjithëse nuk do të mungojnë vranësirat kalimtare në disa zona të veçuara.

Përgjatë kësaj të shtune, vendi vijon të jetë nën pushtetin e valëve të të nxehtit, ku qarqet e Elbasanit dhe Beratit do të prekin 41°C, ndërsa Shkodra dhe Gjirokastra do të regjistrojnë 40°C, me juglindjen që mbetet rajoni më i freskët.

Edhe dita e diel do të sjellë temperatura të larta që variojnë nga 40 në 41°C në qytetet e zonave të ulëta, me të vetmin ndryshim që do të jenë temperaturat e mëngjesit prej 18°C. Dita në tërësi do të mbetet e nxehtë, pavarësisht mundësisë për reshje të pakta shiu në zonat lindore.

Lidhur me javën në vijim, Osmani thekson se temperaturat do të mbeten në nivele të larta, duke osciluar midis 39 dhe 41 gradë Celsius. Ndërsa pjesa më e madhe e territorit do të gëzojë një mot të qëndrueshëm, reshje lokale shiu mund të shfaqen në zona të izoluara, kryesisht gjatë orëve të mesditës. Në përfundim, meteorologu nënvizon se gushti i këtij viti pritet të jetë dukshëm më i nxehtë se vlerat normale për këtë periudhë të vitit.