Gruaja e nxjerr burrin nga koma duke ia kafshuar gishtat e këmbëve

1

Një punëtor në sektorin e hidroizolimit në Kinë, Zhao Jinqian, i cili rrezikoi jetën për të shpëtuar një fëmijë 3-vjeçar, ka arritur të rikthehet në vetëdije pas disa vitesh në gjendje vegjetative, falë përkushtimit të jashtëzakonshëm të bashkëshortes së tij.

Ngjarja ndodhi në tetor të vitit 2019, kur Zhao u ngjit në çatinë e një magazine për të shpëtuar një fëmijë të vogël që kishte përfunduar në strukturën e rrezikshme. Gjatë operacionit të shpëtimit, një pjesë e çatisë u shemb dhe të dy ranë nga rreth 6 metra lartësi.

Në momentin e rënies, Zhao e mbajti fort fëmijën dhe e ktheu trupin e tij në mënyrë që të përthithte të gjithë goditjen, duke i shpëtuar jetën të voglit. Fëmija nuk pësoi lëndime të rënda, ndërsa Zhao u plagos rëndë, duke thyer disa kocka dhe duke pësuar dëmtime serioze në tru, shkruan Daily Star, transmeton Klankosova.tv.

Mjekët i thanë bashkëshortes së tij, Song Mei, se shanset për rikuperim ishin minimale dhe se ishte mrekulli që ai kishte mbijetuar.

Song, 45 vjeçe, la punën si mësuese arti për t’iu përkushtuar plotësisht kujdesit ndaj bashkëshortit. Me këshillën e mjekëve, ajo i bënte çdo ditë masazhe për të stimuluar sistemin nervor. Një ditë, teksa po i masazhonte gishtat e këmbëve, vendosi t’i kafshonte lehtë një gisht dhe vuri re një reagim të vogël.

Që nga ai moment, ajo e përsëriti këtë metodë rregullisht, duke besuar se stimulimi i vazhdueshëm ndikoi në përmirësimin e gjendjes së tij.

Në vitin 2024, Zhao hapi sytë për herë të parë pas disa vitesh. Edhe pse në atë kohë nuk mund të fliste apo të lëvizte, reagimet e tij u bënë gjithnjë e më të forta. Gjatë gjithë kësaj periudhe, Song i fliste dhe i këndonte çdo ditë për ta mbajtur trurin aktiv, ndërsa flinte më pak se katër orë në natë për t’u kujdesur vazhdimisht për të.

Pavarësisht vështirësive financiare pas largimit nga puna, familja mori ndihmë edhe nga babai i fëmijës që Zhao kishte shpëtuar. Ai organizoi mbledhjen e rreth 45 mijë juanëve (rreth 6 mijë euro) për të mbuluar shpenzimet e trajtimit dhe jetesës.

Sot, dy vite pas shenjave të para të përmirësimit, Zhao është në gjendje të kuptojë atë që i thotë bashkëshortja. Edhe pse ende flet shumë pak, ai arrin të komunikojë me gjeste dhe, me ndihmë, mund të qëndrojë në këmbë për periudha të shkurtra. Historia e tij konsiderohet një dëshmi e jashtëzakonshme e sakrificës, dashurisë dhe shpresës./Klankosova.tv