Rrëfimi i Rozalinda Plakës mbi lidhjen me Refit Buzin dhe tragjedinë e fundit – Lajme Big Brother Vip

Dëshmia e Rozalinda Plakës, ish-të fejuarës së Refit Buzit, ka dalë në dritë pas ngjarjes tragjike ku ai vrau prindërit e saj dhe më pas e mbajti peng. Gazetarja e Top Channel, Anila Hoxha, ka siguruar këtë rrëfim që përfshin marrëdhënien e tyre, arsyet e ndarjes dhe situatën e tmerrshme që pasoi.

Sipas Rozalindës, lidhja e tyre ka filluar disa vite më parë, por vështirësitë brenda marrëdhënies e detyruan atë të kërkonte ndarjen në vitin 2024. Megjithatë, ajo nuk ka specifikuar detaje rreth financave, që sipas supozimeve ishin një faktor i rëndësishëm në këtë situatë. Ajo ka theksuar se prindërit e saj ishin të vetëdijshëm për vështirësitë që po përjetonin dhe asnjëherë nuk e kanë mbështetur këtë lidhje nga fillimi.

“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar. Arsyeja ka qenë sepse ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua. Këto gjëra i dinin edhe prindërit e mi, të cilët nuk kanë qenë dakord për këtë lidhje që në fillim.”

Ndërsa ka ndodhur sulmi në shtëpinë e saj, Rozalinda ka treguar se ishte duke fjetur, derisa dëgjoi një zhurmë të fortë, që e perceptoi si një krismë arme.

“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur. Kur dola kam parë shtetasin Refit Buzi në korridor, me një armë të gjatë si ato të gjahut në dorë, si dhe kam parë babain tim Kosta Plaka të shtrirë përmbys te hyrja e dhomës, i mbuluar me gjak. Unë i kam kapur armën dhe po e mbaja, por Refiti bërtiste: ‘Do t’ju vras të gjithëve’. Më shtyu dhe më qëlloi me grusht, theu derën e dhomës sime dhe aty jam plagosur me copa xhami në trup.”

Ajo tregon se është marrë me forcë nga Refit buzi dhe është detyruar të largohet nga shtëpia me të.

“Më mori me forcë e më hipi te makina. Momenti kur më mori me forcë nga shtëpia deri kur kam hipur në makinë nuk më kujtohet, sepse kam qenë shumë e tronditur.”

Gjatë negociatave me policinë për dorëzimin e tij, Rozalinda ka zbuluar një detaj tjetër: Buzi kishte qenë zbathur dhe gjatë bisedës me autoritetet, ai tha se i kishte dhënë asaj këpucët e tij.

Gjatë negociatave, prokurori e pyeti: “Vetëdorëzohu, pse je zbathur?”, ndërsa përgjigja e tij ishte: “I hoqa, ia dhashë… Ia dhashë asaj t’i veshë, se e mora zbathur.”. Hetimet vazhdojnë për të zbardhur të gjitha rrethanat dhe motivet e kësaj tragjedie me tre viktima.