45-vjeçari ia vë flakën nënës në Gjermani, lëndon rëndë edhe gjyshen

1

Një 45-vjeçar është arrestuar nga policia gjermane pas një ngjarjeje të rëndë kriminale në Hunfelden-Kirberg, ku dyshohet se ka privuar nga jeta nënën e tij.

Sipas policisë, të enjten, më 9 korrik, rreth orës 17:20, shërbimet emergjente u njoftuan për zjarr në një banesë në rrugën Weiherweg, në Hunfelden-Kirberg, raportojnë mediat gjermane, transmeton klankosova.tv.

Pas mbërritjes në vendngjarje, ekipet e ndërhyrjes gjetën brenda objektit trupin e pajetë të një gruaje 76-vjeçare. Në të njëjtën banesë u gjet edhe një grua 103-vjeçare, e cila kishte pësuar plagë të rënda dhe u dërgua në spital për trajtim mjekësor.

45-vjeçari dyshohet se sulmoi nënën gjatë një konflikti

Sipas hetimeve paraprake, autoritetet dyshojnë se 45-vjeçari ka sulmuar nënën e tij 76-vjeçare gjatë një konflikti në banesën ku jetonin së bashku dhe më pas i ka vënë flakën asaj.

Gruaja ka vdekur në vendngjarje si pasojë e plagëve të rënda. Në momentin e ngjarjes, në shtëpi ndodhej edhe gjyshja 103-vjeçare e të dyshuarit.

Policia zhvilloi një operacion të gjerë kërkimi

Pas ngjarjes, i dyshuari u largua nga vendi i krimit. Policia nisi menjëherë një operacion të gjerë kërkimi, ku u angazhuan një helikopter policie, qen gjurmues dhe forca të posaçme të policisë së landit Hessen.

Pas disa orësh kërkimesh, 45-vjeçari u lokalizua rreth orës 20:05 dhe u arrestua pa rezistencë.

Hetimet vijojnë

Autoritetet po vazhdojnë hetimet për të përcaktuar saktësisht se çfarë ka ndodhur dhe cilat kanë qenë shkaqet që çuan në këtë ngjarje tragjike. Policia nuk ka bërë ende publike detaje të tjera për shkak se hetimet janë në zhvillim.