Fahrije Hoti i bashkohet Vjosa Osmanit për zgjedhjet e 7 qershorit
1
Ish-presidentja e Kosovës, Vjosa Osmani, ka njoftuar se Fahrije Hoti, i është bashkuar rrugëtimit politik të saj, për zgjedhjet e 7 qershorit, raporton Klankosova.tv
Në postimin e saj në Facebook, Osmani tha se heroina e gjallë e këtij vendi, do të bëhet deputete e Kuvendit, me besimin e përbashkët për një Kosovë, “ku dashuria e mund urrejtjen, integriteti dhe puna e ndershme e mundin manipulimin, dhe e vërteta e mund propagandën.”
“Një heroinë e gjallë në Kuvendin e Kosovës!
Kur një grua vendos të ngrihet, ajo e bën këtë për të gjithë.
E fortë si guri, e pastër si loti, punëtore si askush tjetër, krah i përhershëm për gratë, për Krushën dhe për gjithë Kosovën – e pas 7 qershorit, Fahrije Hoti, deputete e Kuvendit, në përfaqësim të secilit prej jush.
Fahrija po i bashkohet rrugëtimit tonë politik, sepse ne besojmë në një Kosovë ku dashuria e mund urrejtjen, integriteti dhe puna e ndershme e mundin manipulimin, dhe e vërteta e mund propagandën.” – shkroi Osmani.
Në fund, ajo tha se me dinjitet, do ta dëshmojnë forcën e tyre, raporton Klankosova.tv
“Këtë forcë e kemi dëshmuar bashkë edhe përballë Vuçiçit në Këshillin e Sigurimit, në Parlamentin Evropian dhe kudo tjetër — me dinjitet, me të vërtetën tonë, me zërin e grave që nuk heshtin.
Do ta dëshmojmë sërish, bashkë.
Na priftë e mbara, e dashur Fahrije! ♥️”
Fahrija, nga Krusha e Madhe e Rahovecit, që nga lufta e fundit ka të zhdukur burrin, por dhimbjen e ktheu në forcë edhe për 50 gra krushjane si ajo, që themeluan Koperativen “Krusha”.
