Sipas mediave italiane, një burrë 57-vjeçar me origjinë shqiptare, i identifikuar si Astrit Koni, dyshohet se ka vrarë ish-bashkëshorten dhe partnerin e saj të ri, gjithashtu shqiptar, përpara se t’i jepte fund jetës duke u hedhur nga kalaja e fshatit.
Trupat e dy viktimave u gjetën paraditen e sotme në një hendek, pranë një fushe ku ndodheshin disa koshere bletësh, për të cilat kujdesej çifti.
Viktimat ishin të vendosura në një distancë të vogël nga njëri-tjetri ndërsa pranë tyre u gjet edhe një mjet bujqësor, me të cilin dyshohet se janë goditur për vdekje.
Alarmin e dha vëllai i gruas, i cili u shqetësua pasi nuk kishte marrë asnjë lajm prej saj. Ndërkohë, sipas hetimeve paraprake, autori i dyshuar është hedhur nga kalaja gjatë natës, duke i dhënë fund jetës.
Karabinierët kanë nisur hetimet për të zbardhur plotësisht dinamikën e ngjarjes, ndërsa komuniteti lokal është i tronditur nga ky akt i rëndë.
