Kurti kërkon garanci për 15 nënshkrime nga LDK-ja për Vjosa Osmanin?! – Kape Lajmin
Burime nga takimi Kurti–Abdixhiku: Kryeministri kërkoi garanci për 15 nënshkrime nga LDK-ja në rast të kandidaturës së Vjosa Osmanit
Takimi i sotëm mes kryeministrit Albin Kurti dhe kryetarit të Lidhjes Demokratike të Kosovës, Lumir Abdixhiku, ka përfshirë diskutime konkrete rreth procesit të zgjedhjes së presidentit të ri të vendit dhe rolit që mund të ketë LDK-ja në këtë proces.
Sipas burimeve brenda takimit, të siguruara nga Gazeta Minuti, Kurti i ka kërkuar Abdixhikut një garanci të qartë politike se së paku 15 deputetë të LDK-së do të qëndrojnë në sallë dhe do të japin mbështetjen e nevojshme procedurale në rast se në Kuvend propozohet si kandidate për presidente Vjosa Osmani.
Burimet bëjnë të ditur se kërkesa e Kurtit nuk ka pasur të bëjë vetëm me votimin “pro”, por kryesisht me sigurimin e kuorumit, në mënyrë që procesi të mos dështojë për mungesë pjesëmarrjeje të deputetëve në sallë. Sipas të njëjtave burime, Kurti ka theksuar se pa një angazhim të tillë nga LDK-ja, rreziku për bllokim institucional mbetet i lartë.
Nga ana e tij, Abdixhiku ka shprehur se brenda LDK-së ekzistojnë qëndrime të ndryshme lidhur me kandidaturën e Osmanit, por se partia po shqyrton mundësinë për të arritur një qëndrim të përbashkët që nuk do ta dëmtonte funksionimin e institucioneve. Burimet thonë se Abdixhiku nuk ka dhënë një “po” të prerë në takim, por ka lënë të hapur mundësinë e një marrëveshjeje politike për prani në sallë, edhe në rast se disa deputetë do të votonin kundër.
Diskutimi për emrin e Vjosa Osmanit është zhvilluar në kuadër të përpjekjeve të Kurtit për të siguruar paraprakisht mbështetjen minimale parlamentare për procesin e zgjedhjes së presidentit, në mënyrë që të shmangen skenarët e dështimit të seancave dhe thellimit të krizës politike.
Burime politike vlerësojnë se kërkesa për 15 nënshkrime nga LDK-ja tregon se Kurti po tenton të ndërtojë një siguri numerike para se të ndërmarrë hapin formal të propozimit të kandidatit për president, ndërsa LDK-ja po mundohet të ruajë balancën mes qëndrimeve të brendshme dhe presionit për të kontribuar në zhbllokimin e procesit.
Sipas të njëjtave burime, bisedimet mes Kurtit dhe Abdixhikut pritet të vazhdojnë edhe në ditët në vijim, ndërsa vendimi final për qëndrimin e LDK-së do të varet nga konsultimet e brendshme në strukturat e partisë dhe nga zhvillimet e mëtejme politike.
