“Dasma e shekullit, krizë për qytetin” – banorët e Venecias kundër ceremonisë së Jeff Bezos

Dasma e miliarderit Jeff Bezos me Lauren Sanchez, e planifikuar për më 24 qershor në ishullin San Giorgio Maggiore në Venecia, ka shkaktuar reagime të forta nga banorët vendas.

Shumë venecianë janë të shqetësuar për ndikimin negativ që ngjarja do të ketë mbi qytetin, i cili tashmë vuan nga pasojat e turizmit masiv.

Pritet ardhja e shumë personaliteteve të famshme, çka do të çojë në masa të rrepta sigurie dhe mbyllje rrugësh, në kulmin e sezonit turistik.

Banorët janë gjithashtu të shqetësuar për ndikimin ekologjik të ngjarjes, përfshirë përdorimin e avionëve privatë dhe rritjen e ndotjes me dioksid karboni. Aktivistët kanë paralajmëruar protesta, duke akuzuar Bezosin se po e shndërron Venecian në “lojë për të pasurit”.

Ndërkohë, kryetari i bashkisë Luigi Brugnaro ka konfirmuar se dasma do të zhvillohet dhe se autoritetet po bashkëpunojnë me organizatorët për ta mbajtur ngjarjen në përputhje me vlerat kulturore dhe mjedisore të qytetit.

Megjithatë, shumë banorë mendojnë se autoritetet janë tepër tolerante ndaj interesave të njerëzve të pasur.