A ka pasur tradhti? Klodi flet për herë të parë pas ndarjes nga Elijona
Pas konfirmimit të ndarjes nga Elijona, edhe Klodi ka vendosur të reagojë publikisht, duke iu përgjigjur njëkohësisht aludimeve që kanë qarkulluar ditët e fundit për arsyet e përfundimit të marrëdhënies së tyre.
Përmes një shkrimi në Instagram, ish-banori i “Big Brother VIP Kosova” ka mohuar në mënyrë të prerë se nga ana e tij ka pasur tradhti apo keqtrajtim gjatë lidhjes.
“Për sa i përket teorive të shumta, më duket e kotë edhe që po më duhet t’i adresoj, por u bë pak e tepërt. Nuk ka pasur kurrë as tradhti dhe as keqtrajtim prej anës time. Kam dëgjuar shumë gjëra për veten dhe është e rëndë si për mua, ashtu edhe për familjen time”, shkroi Klodi.
Ai bëri të qartë se, pavarësisht përfundimit të marrëdhënies, ruan respektin dhe ndjenjat e mira për Elijonën. Megjithatë, Klodi zgjodhi të mos tregojë konkretisht se çfarë çoi çiftin drejt ndarjes.
“Koha do të tregojë çdo gjë”, ishte fjalia me të cilën ai mbylli reagimin, duke lënë pa një përgjigje të drejtpërdrejtë pyetjen mbi shkakun e ndarjes.
Vetëm pak më herët ishte Elijona ajo që konfirmoi publikisht se marrëdhënia kishte përfunduar. Ajo deklaroi se të dy kishin zgjedhur të vazhdonin rrugët veçmas, duke kërkuar që fundi i lidhjes të trajtohej me respekt dhe pa u kthyer në një përplasje publike.
Dyshimet kishin nisur pasi Klodi dhe Elijona hoqën njëri-tjetrin nga Instagrami dhe nga profilet e tyre u zhdukën fotografitë e përbashkëta. Këto veprime erdhën pas përfundimit të xhirimeve të Klodit për reality show-n italian “The Fifty Italia”.
Tashmë ndarja është konfirmuar nga të dy, ndërsa Klodi mohon se tradhtia apo keqtrajtimi nga ana e tij kanë qenë shkaku. Arsyeja konkrete që çoi në fundin e marrëdhënies, të paktën deri tani, mbetet private.
