Kush e zëvendëson Megi Pojanin? Zbulohet moderatorja e re e “Për’puthen” – Lajme Big Brother Vip

Pas konfirmimit se Megi Pojani nuk do ta prezantojë më “Për’puthen”, tanimë kanë nisur të qarkullojnë të dhënat e para lidhur me kastin e ri që do të udhëheqë sezonin në vijim.

Bazuar në informacionet e publikuara nga Kryefjala.com, roli i moderimit i është besuar Heidi Bacit. Ish-banorja e “Big Brother VIP Albania 3” ka qenë pjesë e ekranit të Top Channel edhe pas përfundimit të këtij formati televiziv.

Baci ishte ndër dy kandidaturat kryesore që u përfolën për të zënë vendin e lënë bosh nga Pojani. Megjithëse edhe emri i Selin Bollatit, fitueses së “Big Brother VIP Albania”, u shfaq si mundësi, të dhënat e fundit favorizojnë Heidi Bacin.

Lëvizjet në këtë program nuk kufizohen vetëm te prezantuesja. Në krah të Bacit flitet se do të jetë Ronaldo Sharka, ndonëse natyra e saktë e detyrës së tij në këtë format mbetet ende e paqartë.

Gjithashtu, në këtë strukturë të re pritet t’i bashkohet edhe Erjola Doçi, e cila do të ketë rolin e opinionistes. Të tre këta personazhe janë figura të njohura për shikuesit e Top Channel, pasi kanë qenë të angazhuar në projekte të tjera televizive të këtij ekrani.

“Për’puthen” po ndërmerr kështu hapa drejt një ndryshimi total të grupit drejtues për sezonin e ardhshëm, pas largimit të Megi Pojanit.

Megjithatë, stacioni televiziv nuk ka dalë ende me një njoftim zyrtar për këto ndryshime. Rrjedhimisht, Baci, Sharka dhe Doçi konsiderohen si emrat që pritet t’i bashkohen programit, derisa televizioni të bëjë një konfirmim publik.