Uran Ismaili publikon reagimin e pensionistes për mungesën e rritjes së pensioneve

1

Nënkryetari i Partisë Demokratike të Kosovës, Uran Ismaili, dhe numri dy në listën e kësaj partie për zgjedhjet e parakohshme të 7 qershorit, ka publikuar një video në rrjetet sociale, ku shihet një grua e moshuar duke folur për masat njëherëshme të qeverisë dhe nevojën për rritje të qëndrueshme të pensioneve.

Në video, ajo thotë se pensionistëve nuk u duhen pagesa të përkohshme, por rritje e rregullt e pensionit, në mënyrë që ta dinë sa të ardhura kanë dhe të mund ta planifikojnë jetën.

“Ma mirë me rritë pensionin, me ditë në start sa e ke, sesa njëherë me t’i jepë e me u mashtru. I kam bë 75 vjet, nuk mundet me më mashtru kurrkush”, thotë ajo.

Duke komentuar këtë deklaratë, Ismaili tha se një qytetare e moshuar e ka shpjeguar më qartë se sa kryeministri se si duhet të funksionojë politika.

Sipas tij, qytetarët nuk kanë nevojë për pagesa të rastit në prag të zgjedhjeve, por për rritje të qëndrueshme të pensioneve, pagave dhe të ardhurave, në mënyrë që familjet të kenë mundësi për planifikim afatgjatë.

“Një grua e moshuar e kupton më mirë politikën sesa një kryeministër që premton e jep para vetëm në kohë zgjedhjesh. Ajo kërkon rritje të pensionit, që njerëzit ta dinë sa kanë dhe ta planifikojnë jetën. Pikërisht këtë e kemi premtuar ne”, ka thënë Ismaili.