Mishi i kuq dhe alkooli në listën e ushqimeve që rrisin rrezikun e kancerit

1

Ekspertët e shëndetit kanë paralajmëruar për disa ushqime dhe zakone që mund të rrisin rrezikun e sëmundjeve të rënda, përfshirë edhe kancerin, nëse konsumohen në mënyrë të shpeshtë.

Sipas analizave të ndryshme shkencore, një nga faktorët më të diskutuar është konsumimi i tepërt i mishit të kuq, i cili është lidhur me rrezik më të lartë për kancer të zorrës së trashë, pankreasit dhe stomakut. Po ashtu, pjekja e mishit në temperatura të larta mund të krijojë komponime potencialisht kancerogjene.

Në listë përfshihen edhe yndyrnat trans, të njohura si yndyrna të hidrogjenizuara, të cilat gjenden në shumë produkte të përpunuara si ëmbëlsira, ushqime të shpejta dhe margarina. Studime të shumta i kanë lidhur këto yndyrna me rrezik më të lartë për kancer të gjirit dhe rektalit.

Po ashtu, ushqimet e konservuara janë vënë nën lupë për shkak të mundësisë së përmbajtjes së substancës BPA në veshjet e kanaçeve, e cila në disa studime është lidhur me probleme shëndetësore, përfshirë diabetin e tipit 2.

Turshitë, megjithëse përmbajnë edhe elementë të dobishëm si probiotikët, kur konsumohen në sasi të mëdha janë lidhur me rrezik më të lartë për kancer të stomakut.

Në listë përfshihet edhe alkooli, konsumimi i tepruar i të cilit është i lidhur me disa lloje kanceri, përfshirë ato të mëlçisë, gjirit dhe zorrës së trashë.

Ekspertët theksojnë se këto ushqime nuk duhet eliminuar plotësisht, por duhet konsumuar me kujdes dhe në mënyrë të moderuar.