Pas një humbjeje të dhimbshme, këngëtari shqiptar bëhet sërish baba dhe zbulon emrin e djalit

Reperi Marini dhe bashkëshortja e tij, Alba Malaj, janë bërë sërish prindër. Çifti ka mirëpritur në jetë një djalë, ndërsa lajmin e kanë ndarë me publikun vetëm pas lindjes.

Ka qenë Alba ajo që ka publikuar në TikTok një video me momente nga muajt e shtatzënisë, të cilën çifti kishte zgjedhur ta mbante larg vëmendjes publike. Në fund të videos shfaqen edhe çastet e para pas lindjes, me Albën në spital duke mbajtur foshnjën në krahë.

Marini dhe Alba kanë zbuluar gjithashtu emrin që kanë zgjedhur për djalin e tyre: Madison.

Ardhja e Madison vjen pas një periudhe të vështirë për familjen. Në vitin 2025, çifti bëri të ditur se kishte humbur djalin e tyre të porsalindur, në një kohë kur prisnin fëmijën e katërt pas tre vajzave, Milana, Melody dhe Marina.

“Ky duhej të ishte një njoftim për ardhjen në jetë të bebit tonë, por fatkeqësisht nuk është. Mëngjesin e së mërkurës humbëm engjëllin tonë të çmuar, djalin tonë”, shkruante Marini në atë kohë.

Reperi tregonte se ai dhe Alba kishin mundur ta mbanin të birin në krahë për një kohë të shkurtër, ndërsa e përshkruante humbjen si një prej periudhave më të vështira për familjen.

Këtë herë, dyshja zgjodhi një mënyrë krejt tjetër për ta përjetuar shtatzëninë, duke mos e bërë publike gjatë muajve të pritjes. Vetëm pasi Madison erdhi në jetë, Alba ndau pamjet e këtij rrugëtimi me ndjekësit.

Familja e Marinit dhe Albës tashmë numëron katër fëmijë, tre vajzat e tyre dhe djalin e porsalindur, Madison.