Pa prisni pak! Arbana Osmani lë “Ferma VIP”, rikthehet në Top Channel?

Një lëvizje e papritur në rrjetet sociale ka rikthyer në vëmendje raportin e Arbana Osmanit me Top Channel, televizionin ku moderatorja ndërtoi pjesën më të madhe të karrierës së saj dhe u kthye në një prej figurave më të rëndësishme të ekranit.

Për vite me radhë, Arbana ishte e lidhur ngushtë me “Big Brother Albania”, ndërsa më vonë mori drejtimin edhe të dy edicioneve të para të “Big Brother VIP Albania”. Megjithatë, pas përfundimit të sezonit të dytë, ajo nuk u rikthye në krye të formatit dhe drejtimin e mori Ledion Liço.

Arsyet e këtij ndryshimi nuk u sqaruan asnjëherë plotësisht publikisht, ndërsa në media dhe rrjetet sociale qarkulluan versione të ndryshme për raportin e moderatores me televizionin.

Dyshimet për një krisje mes Arbanës dhe Ledionit u shtuan edhe më shumë pasi u vu re se ata nuk ndiqnin më njëri-tjetrin në Instagram. Por tani situata duket se ka ndryshuar.

Arbana Osmani dhe Ledion Liço kanë nisur sërish të ndjekin njëri-tjetrin në Instagram, një detaj që nuk ka kaluar pa u vënë re. Madje, Arbana rezulton të ndjekë edhe faqen zyrtare të Top Channel, si dhe Lori dhe Sara Hoxhën.

Koha kur ndodh kjo lëvizje e bën situatën edhe më interesante.

Arbana sapo ka përfunduar sezonin e tretë të “Ferma VIP”, ndërsa një mesazh i saj pas finales ngriti pikëpyetje mbi vazhdimësinë në këtë format.

“Finale. Faleminderit @therealholtagram që më dhe mundësinë të drejtoj këtë spektakël; do jetë një kujtim shumë i bukur. Faleminderit të gjithë atyre që punuan me shpirt në këto muaj, ju e dini cilët jeni dhe ju kam në zemër”, shkroi moderatorja.

Pikërisht formulimi “do jetë një kujtim shumë i bukur” u interpretua nga një pjesë e publikut si një mesazh përmbyllës dhe ngriti dyshime se Arbana mund të mos vazhdojë më në drejtimin e “Ferma VIP”.

Megjithatë, deri më tani nuk ka një konfirmim nga Arbana Osmani apo Vizion Plus se bashkëpunimi mes tyre ka përfunduar. Po kështu, nuk ka asnjë njoftim zyrtar që moderatorja do të rikthehet në Top Channel.

Por fakti që raportet në rrjetet sociale me Ledion Liçon duket se janë normalizuar, së bashku me afrimin virtual me Top Channel dhe motrat Hoxha, ka mjaftuar për të hapur një skenar që deri pak kohë më parë dukej shumë më i largët.

A po përgatitet Arbana Osmani për një rikthim në televizionin ku kaloi shumë prej viteve të karrierës së saj?

Dhe mbi të gjitha, nëse ka një rikthim, a mund ta shohim sërish të lidhur me formatin që e identifikoi për vite me radhë, “Big Brother”?

Për momentin mbeten vetëm pikëpyetje. Por lëvizjet e fundit në Instagram, të ardhura menjëherë pas përfundimit të “Ferma VIP 3”, kanë rikthyer edhe një herë në qendër të vëmendjes një nga rikthimet më të diskutuara të televizionit shqiptar.