Ky është kosovari që u ekstradua nga Shqipëria, i dënuar me 11 vjet burgim për vrasje

2

Një shtetas kosovar i kërkuar me urdhërarrest ndërkombëtar është ekstraduar sot nga Shqipëria në Kosovë, përmes pikës kufitare në Vërmicë.

Burimet e IndeksOnline kanë mësuar së bëhet fjalë për Anton Allakaj.

Gjykata e Pejës e kishte dënuar me 11 vjet e 6 muaj burgim të kërkuarin, ndërsa nga dënimi i kanë mbetur për të kryer 9 vjet e 8 muaj

Policia e Kosovës, përkatësisht Drejtoria për Bashkëpunim Ndërkombëtar Policor (ILECU), në koordinim me njësitet relevante policore dhe institucionet e drejtësisë, ka realizuar ekstradimin e të dyshuarit, i cili ndodhej në arrati.

Sipas Policisë, personi ishte arrestuar nga autoritetet shqiptare bazuar në një urdhërarrest ndërkombëtar të lëshuar përmes INTERPOL-it nga institucionet e drejtësisë së Kosovës.

Pas përfundimit të procedurave të ekstradimit, i dënuari iu dorëzua njësive përkatëse të Drejtorisë Rajonale të Policisë në Pejë, për procedurat e mëtejshme ligjore dhe dërgimin e tij në qendrën korrektuese për vuajtjen e dënimit.

Policia e Kosovës ka vlerësuar se ky ekstradim është rezultat i bashkëpunimit të ngushtë ndërmjet institucioneve të Kosovës dhe Shqipërisë.