Nuk është gjithmonë djegie nga dielli! Këto shenja mund të tregojnë alergji ndaj rrezeve UV

1

Skuqja, kruarja dhe puçrrat që shfaqen pas ekspozimit në diell nuk janë gjithmonë shenjë e një djegieje të zakonshme. Në shumë raste, ato mund të sinjalizojnë alergji ndaj diellit, një gjendje e njohur si fotodermatozë, e cila prek veçanërisht personat me lëkurë të ndjeshme.

Ekspertët shpjegojnë se fotodermatoza është një reagim i tepruar i lëkurës ndaj rrezeve ultravjollcë (UV). Simptomat më të zakonshme përfshijnë skuqje, kruarje, puçrra të imëta, ndjesi djegieje, ndërsa në raste më të rënda mund të shfaqen edhe flluska ose ënjtje.

Rreziku është më i lartë në fund të pranverës dhe në fillim të verës, kur lëkura nuk është përshtatur ende me ekspozimin intensiv ndaj diellit. Përveç predispozitës gjenetike, alergjia mund të nxitet edhe nga disa barna, produkte kozmetike që rrisin ndjeshmërinë ndaj rrezeve UV, si edhe mungesa e disa vitaminave dhe antioksidantëve.

Specialistët theksojnë se mbrojtja nuk kufizohet vetëm te kremi kundër diellit. Ekspozimi gradual, shmangia e diellit në orët me rrezatim më të fortë (10:00–16:00), veshjet mbrojtëse dhe përdorimi i kremrave me SPF 30 ose 50 janë masat më të rëndësishme për të mbrojtur lëkurën.

Një regjim ushqimor i pasur me antioksidantë mund të ndihmojë gjithashtu. Beta-karoteni, vitamina C dhe vitaminat e kompleksit B kontribuojnë në rigjenerimin e lëkurës dhe mbrojtjen e saj nga stresi oksidativ i shkaktuar nga rrezet UV.

Nëse skuqja, kruarja apo flluskat përsëriten çdo verë ose bëhen më të rënda, dermatologët rekomandojnë një vizitë mjekësore. Diagnostikimi në kohë ndihmon të përcaktohet nëse bëhet fjalë për alergji ndaj diellit, reagim ndaj barnave apo një problem tjetër të lëkurës.