Fluturat në bark? 3 shenjat e vërteta që tregojnë një lidhje të fortë sipas psikologëve

7

Shumë njerëz mendojnë se një lidhje e mirë duhet të jetë gjithmonë plot pasion, emocione dhe momente “si në filma”. Por sipas psikologut Mark Travers, një marrëdhënie e shëndetshme në jetën reale është shumë më e qetë dhe e thjeshtë se sa ajo që shihet në rrjetet sociale apo në filma.

Në një artikull për “Forbes”, ai shpjegon se përputhshmëria mes dy personave nuk shihet në momentet e mëdha romantike, por në jetën e përditshme dhe në mënyrën si sillen me njëri-tjetrin në situata të zakonshme.

Sipas tij, një nga shenjat më të rëndësishme është aftësia për të qenë rehat edhe në heshtje apo në momente pa aktivitete të veçanta. Çiftet që nuk ndihen në siklet kur nuk ka biseda apo kur kalojnë ditë të thjeshta së bashku, shpesh kanë më shumë stabilitet emocional. Qetësia në këto raste nuk lidhet me mungesë ndjenjash, por me mungesë ankthi.

Një tjetër element është mënyra si menaxhohen debatet. Marrëdhëniet e shëndetshme nuk janë ato pa konflikte, por ato ku të njëjtat probleme mund të përsëriten, por zgjidhen pa u kthyer në përplasje të forta.

Çiftet që dinë të kërkojnë falje dhe të flasin pas një debati, kanë më shumë gjasa të qëndrojnë bashkë në afat të gjatë.

Travers shton gjithashtu se partneri nuk duhet parë si “gjysma tjetër” që plotëson jetën e dikujt. Sipas tij, lidhjet më të mira janë ato ku secili person ruan jetën e vet, miqtë dhe interesat personale, pa e bërë marrëdhënien varësinë e vetme emocionale.

Në fund, ideja kryesore është se një lidhje e mirë nuk është ajo që duket si film romantik çdo ditë, por ajo ku ka qetësi, respekt, komunikim dhe hapësirë për individualitetin e secilit.