Zgjidhet misteri i dhunimit të një varri në qytetin e Lushnjës, një ngjarje që kishte shkaktuar shqetësim dhe reagime në komunitet.
Sipas informacionit zyrtar, rreth orës 10:00 të mëngjesit, roja i varrezave të qytetit, shtetasi me inicialet O. R., ka vënë re dëmtime të konsiderueshme në pjesën e sipërme të një varri. Ky konstatim ka ngritur menjëherë dyshime për një ndërhyrje të qëllimshme dhe është njoftuar policia.
Nga hetimet paraprake rezulton se varri dyshohet të jetë dëmtuar, madje edhe gërmuar, nga shtetasi Edison Ngresi, 36 vjeç. Sipas të dhënave fillestare, ai mendohet se vuan nga probleme të shëndetit mendor, çka mund të ketë ndikuar në kryerjen e këtij veprimi.
Shërbimet e Policisë kanë ndërhyrë menjëherë duke e shoqëruar shtetasin në ambientet e Komisariatit për kryerjen e veprimeve të mëtejshme procedurale.
Ndërkohë, grupi hetimor vijon punën për të dokumentuar plotësisht rrethanat e ngjarjes dhe për të sqaruar motivet që çuan në këtë akt.
