Lazim Destani:Samiti-një dëshmi e gjallë e unitetit dhe identitetit tonë kombëtar

2

Samiti IV i Diasporës, i organizuar në Pallatin e Kongreseve në Tiranë, mblodhi përfaqësues nga e gjithë bota shqiptare në një platformë të përbashkët dialogu dhe
bashkëpunimi. Ky samit kishte në thelb forcimin e lidhjeve mes Shqipërisë dhe diasporës, duke theksuar rolin e saj të pazëvendësueshëm në zhvillimin e vendit.

Në këtë Samit merr pjesë edhe filantropi i njohur Lazim Destani , i cili tha se ky Samit nuk është thjesht një aktivitet — është një dëshmi e gjallë e unitetit dhe identitetit tonë kombëtar
Përshtypjet e vlerësimet nga ky Samit , Destani i shprehu edhe në rrjetin e tij në social :

Postimi i plotê

Me emocion të veçantë dhe krenari të thellë, nën tingujt e Himnit Kombëtar, pata nderin të jem pjesë e Samitit të IV të Diasporës Shqiptare në Tiranë.

Ky aktivitet i rëndësishëm mblodhi së bashku shqiptarë nga të gjitha trevat dhe nga çdo cep i botës, duke krijuar një atmosferë frymëzuese që bashkonte zemrat, rrënjët dhe vizionin tonë të përbashkët për të ardhmen. Vlerësimi i arritjeve dhe kontributit të jashtëzakonshëm të diasporës shqiptare ishte një dëshmi e qartë se suksesi i shqiptarëve jashtë vendit është një pasuri e çmuar për Shqipërinë.

Me angazhimin e Presidentit të Republikës, Bajram Begaj, aktiviteti hapës u zhvillua në Teatrin Kombëtar të Operas dhe Baletit, duke shënuar një tjetër hap të rëndësishëm në konsolidimin e këtij samiti tashmë tradicional. Në fjalën e tij, Presidenti theksoi rolin jetik të diasporës si forcë dinamike zhvillimi, dhe si urë e fuqishme lidhëse mes Shqipërisë dhe botës. Shqiptarët jashtë vendit mbeten ambasadorët tanë më të denjë, duke promovuar vlerat, kulturën dhe potencialin e vendit tonë.

Në kuadër të samitit, patëm kënaqësinë të zhvillojmë një diskutim të hapur dhe shumë konstruktiv me Ministrin për Evropën dhe Punët e Jashtme, Ferit Hoxha. Ky bashkëbisedim shërbeu si një platformë e rëndësishme për shkëmbimin e ideve dhe për forcimin e bashkëpunimit institucional me diasporën.

Në cilësinë e Kryetarit të Këshillit Koordinues të Diasporës, pata mundësinë të ndaj me të pranishmit ecurinë e deritanishme të Këshillit, sfidat me të cilat jemi përballur, si dhe prioritetet tona për të ardhmen. Theksova domosdoshmërinë e ndërtimit të një bashkëpunimi më të qëndrueshëm, më të strukturuar dhe gjithëpërfshirës me diasporën shqiptare, si dhe nevojën për intensifikimin e koordinimit dhe aktiviteteve të përbashkëta mes KKD-së, Ministrisë dhe Agjencisë Kombëtare të Diasporës.

Shpreh mirënjohjen time të sinqertë për të gjithë anëtarët e KKD-së për kontributin e tyre të vyer dhe për diskutimet me vlerë, si dhe për qasjen e hapur, bashkëpunuese dhe vizionare të Ministrit.

Ky samit nuk është thjesht një aktivitet — është një dëshmi e gjallë e unitetit dhe identitetit tonë kombëtar. Për disa ditë me radhë, Tirana shndërrohet në një pikëtakim të rëndësishëm për shqiptarët kudo që janë, duke na rikujtuar se, pavarësisht distancave, ne mbetemi një komb i bashkuar nga historia, kultura dhe aspiratat e përbashkëta për të ardhmen