Një ngjarje e rëndë dhe tragjike është regjistruar gjatë natës mes së shtunës dhe të dielës në qytetin e Massa-s, në Itali, ku një 47-vjeçar ka humbur jetën pas një sulmi të dhunshëm.
Sipas mediave italiane, viktima është përfshirë në një përplasje me një grup prej katër ose pesë personash të paidentifikuar. Gjatë incidentit, ai ka rënë në tokë dhe ka goditur rëndë kokën, duke pësuar më pas edhe një arrest kardiak. Pavarësisht ndërhyrjes së menjëhershme të ekipeve mjekësore, të cilët kanë kryer manovrat e reanimacionit në vendngjarje, 47-vjeçari nuk ka mundur të mbijetojë.
Ngjarja ka ndodhur rreth orës 01:00 të mëngjesit, ndërsa viktima ndodhej në një restorant familjar së bashku me djalin e tij të mitur dhe partneren. Sipas hetimeve paraprake, një grup adoleshentësh të moshës 16 deri në 18 vjeç kishte qenë duke shkaktuar shqetësime, duke hedhur shishe drejt një dritareje të lokalit. Në këtë moment, viktima dhe kunati i tij kanë ndërhyrë për t’i ndaluar, duke u përpjekur të qetësonin situatën.
Përplasja verbale dhe fizike është përshkallëzuar shpejt, duke çuar në sulmin që rezultoi fatal. Burri ka rënë në tokë gjatë konfliktit dhe ka pësuar dëmtime të rënda në kokë, të cilat i shkaktuan vdekjen.
Gjithashtu, kunati i tij është plagosur gjatë përplasjes dhe është dërguar në spital për trajtim mjekësor. Ndërkohë, djali 11-vjeçar i viktimës ka qenë dëshmitar i ngjarjes së rëndë dhe ka marrë ndihmë mjekësore për shkak të gjendjes së rënduar emocionale.
Pas incidentit, autorët janë larguar nga vendngjarja dhe aktualisht ndodhen në kërkim nga forcat e policisë. Autoritetet italiane kanë nisur hetimet për të zbardhur plotësisht rrethanat dhe për të identifikuar përgjegjësit e kësaj ngjarjeje tragjike.
