Kryeministri Edi Rama zhvilloi një takim me fermerët në Lushnjë, ku u ndal te mënyra se si bujqësia mund të sjellë më shumë të ardhura për ata që punojnë tokën.
Ai u shpreh se problemi kryesor nuk është mungesa e parave, por mënyra si përdoren ato.
Sipas tij, fermerët duhet të fokusohen te organizimi dhe bashkëpunimi për të përfituar më shumë nga puna e tyre.
Gjatë bisedës, Rama u ndal te ideja e bashkimit të fermerëve, duke thënë se kur ata bashkëpunojnë në prodhim dhe sidomos në shitje, mund të fitojnë deri në 30% më shumë.
Secili mund të vazhdojë të punojë tokën e vet, por kur del në treg si pjesë e një grupi, krijon më shumë siguri dhe mundësi.
Ai shtoi se në skemat e reja të financimit prioritet do të kenë ata që duan të rrisin aktivitetin dhe të punojnë më shumë në bujqësi.
Në fund, Rama komentoi edhe debatet e fundit për çmimin e naftës, duke kritikuar mënyrën se si, sipas tij, disa qëndrime po shtrembërohen për qëllime politike.
