Në spektaklin e sotëm të “Ferma VIP” ka ndodhur një nga ngjarjet më të papritura dhe më të rralla për një format reality show, ku një konkurrent ka sakrifikuar me vetëdije të plotë rrugëtimin e tij për të shpëtuar një tjetër.
Tre fermerët, Akili, Fairfax dhe Gresa, u përballën me një sfidë fizike deçizive me rregulla shumë të qarta: dy prej atyre që do të humbisnin, do të shkonin automatikisht në një nominim “kokë më kokë”.
Gjatë zhvillimit të lojës, Akili arriti të përfundonte sfidën shumë më herët se dy vajzat. Por, në një lëvizje që i la të gjithë pa fjalë, ai vendosi të mos i binte kambanës për të shpëtuar veten. Në vend të kësaj, ai qëndroi duke pritur që njëra nga vajzat të përfundonte garën.
Gresa arriti të mbyllte sfidën para Fairfax dhe shkoi t’i binte kambanës, duke siguruar kështu shpëtimin e saj të menjëhershëm nga televotimi.
Me këtë gjest të llogaritur, Akili “dogji” veten për Gresën, duke u vetëofruar të shkojë në një nominim përballë Fairfax.
Veprime të tilla altruiste janë të rralla në formate televizive ku gara për çmimin e madh bëhet gjithnjë e më e ashpër.
Kjo lëvizje jo vetëm që tregon shumë për karakterin e tij në lojë, por pritet të ndryshojë edhe dinamikat e marrëdhënieve brenda fermës në ditët në vijim.
