Raporti mes Monika Kryemadhit dhe Ilir Metës ka kaluar tashmë në një shkëputje totale.
Së fundmi, ajo ka folur hapur për natyrën e marrëdhënies së tyre aktuale, duke konfirmuar se mes tyre nuk ekziston më asnjë urë komunikimi, qoftë e karakterit politik apo personal, me përjashtim të detyrimeve prindërore.
Ajo ka theksuar se shkaku kryesor i kësaj situate lidhet me mungesën e besimit nga ana e tij, një veprim që ajo shprehet se nuk mund ta tolerojë.
Gjatë deklaratës së saj, Kryemadhi zbuloi edhe një episod të veçantë rreth aludimeve për një tjetër lidhje të mundshme jashtëmartesore, të ngritura për shkak të një numri të ruajtur në telefonin e saj.
“Nuk kam më asnjë raport, qoftë politik apo emocional me Metën. Jam vetëm në raport me fëmijët. Unë, jo vetëm Metës, por kujtdo njeriu nuk i fal kurrë mungesën e besimit që kishin ndaj meje. Nuk do ta pranoja kurrë që besimin e Metës ndaj meje ta thyente një njeri kalimtar në jetën e tij. Nuk kam vendosur kurrë në dyshim asnjë vendim të tij. Unë Ilir Metën e kisha regjistruar me emrin ‘zemra ime’, kurse Metës i kishin thënë që Monika ka dashnor, ka të dashur. Kur e lexoi prokurori që numri i regjistruar si ‘zemra ime’ ishte Ilir Meta, ngelën të gjithë. Ilir Meta besoi më shumë rrethin e tij shoqëror sesa mua,” — u shpreh ajo.
Kujtojmë se dyshja, e cila ka ndarë një rrugëtim të gjatë bashkë si në jetën personale ashtu edhe në skenën politike shqiptare, ndodhet aktualisht në një proces zyrtar divorci, një zhvillim që ka ardhur paralelisht me përballjen e tyre me çështjet e hapura me drejtësinë.
