Stafi i Kombëtares shqiptare ka marrë lajme jo shumë pozitive nga Turqia në lidhje me gjendjen fizike të sulmuesit Rey Manaj. Futbollisti kuqezi u detyrua të largohej nga fusha shumë herët gjatë ndeshjes së zhvilluar mes Sivassporit dhe Umraniyespor, pasi ndjeu një shqetësim muskular në pjesën e sipërme të kofshës së majtë. Ky moment ka ngritur menjëherë shqetësim jo vetëm te skuadra e tij në Turqi, por edhe te stafi teknik i Kombëtares shqiptare, që po ndjek me vëmendje situatën e lojtarit.
Manaj, i cili nuk ishte i pranishëm në sfidën e mëparshme të Sivassporit kundër Hatayspor, në këtë takim ishte rikthyer në formacionin titullar dhe pritej të kishte një rol të rëndësishëm në repartin ofensiv të skuadrës së tij. Megjithatë, ndeshja për të zgjati shumë pak. Vetëm në minutën e 7-të të takimit, sulmuesi shqiptar kërkoi zëvendësim pasi nuk ishte më në gjendje të vazhdonte lojën për shkak të dhimbjeve të ndjera në muskul.
Momenti i dëmtimit krijoi shqetësim të madh në pankinën e Sivassporit, ndërsa stafi mjekësor ndërhyri menjëherë për ta ndihmuar lojtarin. Pas disa minutash vlerësimi në fushë, u vendos që Manaj të mos rrezikonte më tej dhe të zëvendësohej, në mënyrë që të shmangej përkeqësimi i mundshëm i dëmtimit.
Deri në këto momente nuk ka ende një informacion të qartë mbi shkallën e dëmtimit të sulmuesit shqiptar. Gjithçka pritet të bëhet më e qartë pas ekzaminimeve të detajuara mjekësore që do të kryhen në orët dhe ditët në vijim. Rezultatet e këtyre kontrolleve do të përcaktojnë edhe kohën e rikuperimit të lojtarit.
Ky lajm vjen në një moment shumë delikat për Kombëtaren shqiptare, pasi vetëm 11 ditë e ndajnë skuadrën nga përballja shumë e rëndësishme kundër Polonisë në kuadër të fazës Play Off për Botërorin që do të zhvillohet në SHBA, Meksikë dhe Kanada. Nëse dëmtimi i Manajt rezulton serioz, kjo mund të jetë një mungesë e ndjeshme për repartin ofensiv të kuqezinjve në një ndeshje kaq vendimtare.
